بیلجیئم:دہشتگردی کےخطرےکےپیش نظرسال نوکی تقریب منسوخ

بیلجیئم میں دہشتگردی کےخطرےکےپیش نظرسال نوکی تقریب منسوخ کردی گئی،دہشتگردی کےممکنہ حملےکےپیش نظر آتش بازی کی تقریب نہیں ہوگی۔

پیرس حملوں کے بعد سال نو کے موقع پر فرانس اور بیلجیئم سمیت یورپ بھر میں سیکیورٹی کے انتہائی سخت انتظامات کیے گئے ہیں جبکہ برسلز میں دہشت گردی کے خطرے کے پیش نظر نئے سال کی روایتی تقریب منسوخ کردی گئی ۔ پیرس میں بھی لائٹ شو اور آتش بازی کی تقریب نہیں ہو گی ۔

بیلجیئم کے سرکاری وکیل کے مطابق ملک کے مختلف علاقوں میں چھاپوں کے دوران 2 مشتبہ افراد کو گرفتار کیا گیا ہے ، جو نئے سال کی تقریبات کے دوران حملوں کی منصوبہ بندی کر رہے تھے۔ برسلز کے میئر نے



اعلان کیا کہ دہشتگردی کے خطرے کے باعث نئے سال پر روایتی آتش بازی کی تقریب نہیں ہو گی۔

ادھر فرانس کے شہر پیرس میں بھی نئے سال کی تقریبات محدود کردی گئی ہیں ۔ حکام کے مطابق ویڈیو لائٹ شو اور آتش بازی کی تقریب منسوخ کردی گئی ہیں اور سیکیورٹی ہائی الرٹ ہے ، اس موقع پر 11ہزار فوجی اہلکار ، پولیس اور ایمرجنسی ورکرز تعینات ہوں گے۔

برطانیہ اور جرمنی سمیت دیگر یورپی ممالک میں بھی نئے سال کے موقع پر سیکیورٹی کے انتہائی سخت انتظامات کیے گئے ہیں۔

دوسری جانب امریکا میں بھی نئے سال کے استقبال کے موقع پر سیکورٹی سخت ہے ۔نیو یارک کے ٹائمز اسکوائر میں کرسٹل بال کو ٹیسٹ کیا گیا جو سال نو کی تقریبات کا اہم حصہ ہے۔